Azərbaycanda bu zavod bağlanır
27 Aprel 2024
7 yaşlı uşağın ölümünə səbəb olan məşqçinin cəzası məlum oldu
14:43 - 19 Mart 2024
7 yaşlı Fərid Bakarov cinayəti ilə bağlı məhkəmə araşdırması başa çatıb.
Manset.az “Qafqazinfo”ya istinadən xəbər verir ki, Sumqayıt Ağır Cinayətlər Məhkəməsində keçirilən yekun iclasda təqsirləndirilən idmançı son söz deyib.
Müttəhim Mehman Xəlilov azyaşlını bilərəkdən öldürmədiyini deyərək məhkəmədən ədalətli hökm çıxarılmasını xahiş edib: “Mənim o, uşağa qarşı nə qərəzim ola bilərdi? Mən onu bilərəkdən öldürməmişəm. Fərid mənim ən sevdiyim tələbəm olub. Onun üçün canımı da verərdim. Kim kameralar altında adam öldürər? Bu hadisə istəmədən başıma gəlib. Bədbəxt hadisədir. Mənim üçün şeytan, o uşaq üçün əcəl gəldi. Məlum video sosial şəbəkələrdə yayıldı deyə belə oldu”.
Fəhmin Hümbətovun sədrlik etdiyi hakimlər heyəti müşavirə otağında belə qənaətə gəliblər ki, təqsirləndirilən şəxsə verilmiş ittiham məhkəmə istintaqı ilə sübuta yetirilib.
Hökmə əsasən M.Xəlilov xüsusi amansızlıqla köməksiz vəziyyətdə olan adamı öldürməkdə təqsirli bilinərək 19 il müddətinə azadlıqdan məhrum edilib. O, cəzasını ciddi rejimli cəzaçəkmə müəssisəsində çəkəcək.
Qeyd edək ki, hadisə ötən ilin aprelində Sumqayıt şəhərində yerləşən 19 nömrəli məktəbin idman zalında baş verib. Cinayətin baş vermə anının görüntüləri sosial şəbəkələrdə yayılıb. Videodan görünür ki, Mehman Xəlilov məşqdə zərərçəkmiş Fərid Bakarovun saçından, başından, qulağından tutaraq havaya qaldırıb, həmçinin təpiklə vurub və digər təhlükəli hərəkətlər edib. Hadisə nəticəsində F.Bakarov vəfat edib.
Mehman Xəlilova qarşı Cinayət Məcəlləsinin 120.2.4 (xüsusi amansızlıqla adam öldürmə) və 120.2.9-cu (xüsusi amansızlıqla və təqsirkar şəxs üçün aşkar surətdə köməksiz vəziyyətdə olan adamı öldürmə) maddələri ilə yekun ittiham verilib. Lakin Xəlilov özünü eyni məcəllənin 124-cü (ehtiyatsızlıqdan adam öldürmə) maddəsi ilə təqsirli bilir.
Digər xəbərlər
Xəbər xətti
Ən son xəbərləri səhifəmizdən də izləyin