Çin prezidenti Şi Cinpin Nyu-Yorkda yerləşən ABŞ-Çin Münasibətləri üzrə Milli Komitənin illik qala şam yeməyinə təbrik mesajı göndərib.
Manset.az-ın xarici mediaya istinadən xəbərinə görə, Şi Cinpin mesajında komitənin iki ölkənin müxtəlif sahələrdə əməkdaşlığına verdiyi töhfələri yüksək qiymətləndirib, həmçinin, qala mərasimində mükafat alan ABŞ-ın keçmiş dövlət katibi Henri Kissinceri təbrik edib.
Şi mesajında Çinin fikir ayrılıqlarını idarə etmək və qlobal çağırışlara cavab vermək üçün ABŞ ilə əməkdaşlığa hazır olduğunu bildirib.
“Dünyanın iki böyük ölkəsi kimi Çin və ABŞ dünyanın sülh və inkişafı üçün bəşəriyyətin gələcəyi ilə sıx əlaqəli olan dövlətlərarası qarşılıqlı fəaliyyət üçün düzgün yol tapa bilər. Çin Birləşmiş Ştatlarla qarşılıqlı hörmət, dinc yanaşı yaşama və qazan-qazan əməkdaşlıq prinsipləri əsasında qarşılıqlı faydalı əməkdaşlığa, fikir ayrılıqlarını lazımi şəkildə idarə etməyə və qlobal çağırışlarla mübarizədə birgə səylər göstərməyə hazırdır. Ümid edirəm ki, komitə və müxtəlif dairələrdən olan bütün dostlar Çin-ABŞ münasibətlərini dəstəkləyəcək və ikitərəfli münasibətlərin möhkəm və sabit inkişafının təşviqində konstruktiv rol oynayacaqlar".
Qeyd edək ki, qala şam yeməyinə ABŞ prezidenti Co Bayden də təbrik mesajı göndərib.
Əfsanə
Manşet.az
