Azərbaycan millisinin Avropa çempionatı üçün heyəti dəqiqləşdi Manset.az

Azərbaycan millisinin Avropa çempionatı üçün heyəti dəqiqləşdi

19:58 - 17 Avqust 2021

Avropa çempionatının final mərhələsində iştirak edəcək qadın voleybolçulardan ibarət Azərbaycan milli komandası çempionata hazırlığı başa vurub.

Manşet.az xəbər verir ki, yığma iki ay davam edən hazırlıq mərhələsində, qə Mingəçevirdə, Bakıda, ardınca isə Yunanıstanda, Macarıstanda və Bosniya və Herseqovinada təlim-məşq toplanışları və yoxlama oyunları keçirib.

Vüqar Əliyevin rəhbərlik etdiyi komanda Bosniya və Herseqovinadakı məşqlərdə tam heyətlə iştirak edib. Bir müddət əvvəl əməliyyat olunan Olena Xarçenko da, son toplanışda komandayla birgə məşqlərə qatılıb. Bəzi təcrübəli voleybolçular isə bu Avropa çempionatında komandaya kömək edə bilməyəcəklər. Buna səbəb həmin oyunçuların zədələri və bərpa mərhələsinin başa çatmaması olub.

Pandemiya səbəbindən məşqsiz qalan voleybolçular uzun fasilədən sonra iki ay təlim-məşq toplanışlarında və yoxlama oyunlarında öz əvvəlki formalarını bərpa etməyə çalışıblar. Onlar ciddi həkim nəzarəti altında məşq ediblər. Çünki, bəzi voleybolçular hazırlıq prosesində bel və diz zədələri ilə üzləşiblər. Buna baxmayaraq, onlar həkimin müalicə protokolunu və fiziki məşqçinin verdiyi proqramları yerinə yetirərək tezliklə meydançaya qayıtmaq üçün əllərindən gələni ediblər.

Gənc oyunçuların da cəlb olduğu komandada 4 voleybolçu ilk dəfə Avropa çempionatında mübarizə aparacaq. Yığma ardıcıl 9-cu dəfədir qitə birinciliyində iştirak edəcək.

Avropa çempionatında yığmanın heyətində Ayşən Abduləzimova, Olena Xarçenko, Kseniya Pavlenko, Yana Doroşenko, Kristina Besman, Şəfaqət Alışanova, Nilufər Ağazadə, Anastasiya Mertsarova, Mariya Kirilyuk, Marqarita Stepanenko, İlhamə Əliyeva, Bəyaz Alıyeva, Yuliya Kərimova, Anastasiya Bayduk çıxış edəcəklər. Bu yarışda baş məşqçi Vüqar Əliyevə Əliyevə, Eldar Yusubov, Emin Əbilov və Sinişa Popek köməklik göstərəcəklər.

Milli komanda avqustun 17-də Bosniya və Herseqovinadan birbaşa çempionatın keçiriləcəyi Serbiyanın paytaxtı Belqrad şəhərinə yollanıb.

Qeyd edək ki, A qrupunda yarışacaq Azərbaycan millisinin ilk matçı avqustun 20-də Belçika seçməsinə qarşı olacaq.
Komandanın oyunları İctimai Televiziya vasitəsilə canlı yayımlanacaq.

Oyunların təqvimi

20 avqust
19:00. Azərbaycan - Belçika
21 avqust
20:00. Azərbaycan – Bosniya və Herseqovina
22 avqust
19:00. Rusiya – Azərbaycan
24 avqust
22:00. Azərbaycan - Serbiya
25 avqust
19:00. Fransa – Azərbaycan