"Qarabağ" səfərdə "Marsel"ə uduzdu Manset.az

"Qarabağ" səfərdə "Marsel"ə uduzdu

01:43 - 18 Fevral 2022

"Qarabağ” UEFA Konfrans Liqasının pley-off mərhələsində ilk oyununu keçirib.

Manset.az-ın məlumatına görə, Ağdam klubu tarixi matçda Fransa "Marsel"inin qonağı olub. "Velodrom" stadionunda oynanılan qarşılaşma meydan sahiblərinin 3:1 hesablı qələbəsi ilə başa çatıb.

Oyuna yaxşı başlayan “köhlən atlar” 7-ci dəqiqədə hesabı açmağa yaxın olublar. Lakin Abdullah Zubir qapıçı Stiv Mandanda ilə üzbəüz epizodda zərbə vurmağa gecikdiyindən fürsəti boşa verib. Cəmi 2 dəqiqə sonra isə fransalı yarımmüdafiəçinin fərqlənməsinə həmyerlisi olan 37 yaşlı qolkiper imkan verməyib. Fransa təmsilçisi ilk real qol vəziyyətini 14-cü dəqiqədə yaradıb. Amma Arkadiuş Milikin vurduğu topu Luka Quqeşaşvili qaytarıb. Bundan 3 dəqiqə sonra Toral Bayramov sol cinahdan cərimə meydançasına iti ötürmə versə də, komanda yoldaşlarından heç kim topa toxuna bilməyib. 30-cu dəqiqədə Bubakar Kamaranın uzaq məsafədən qüvvətli zərbəsi təhlükəli alınsa da, az fərqlə qapının üstündən keçib. 39-cu dəqiqədə Quqeşaşvilinin kobud səhvi künc zərbəsi ilə nəticələnib. Gürcüstanlı qapıçı hücumun davamında növbəti dəfə çıxışda səhvə yol verib. Fürsətdən maksimum yararlanan Milik 41-ci dəqiqədə hesabı açıb. “Qarabağ” qolun şokundanm ayılmamış ikinci topu qapısında görüb. Cəmi 3 dəqiqə sonra polşalı hücumçu dublunu rəsmiləşdirib. Bu epizodda əvvəlcə Marko Veşoviç, ardınca isə Kevin Medinanın səhvləri həlledici rol oynayıb. Ağdamlılar ilk hissənin sonuncu dəqiqəsində fərqi azalda bilərdilər. Toral Bayramov Mandanda ilə qarşı-qarşıya qalsa da, qapıçı səddini keçə bilməyib. Beləliklə, Qurban Qurbanovun baş məşqçi olduğu kollektiv fasiləyə məğlub yollanıb.

İkinci hissəyə yaxşı başlayan tərəf isə “Marsel” olub. Bunun məntiqi nəticəsi kimi, Milik ardıcıl 2 epizodda təhlükə yaradıb. 50-ci dəqiqədə “Qarabağ”ın heyətində Filip Ozobiçin zərbəsi qapı dirəyindən meydanı tərk edib. Az sonra “Marsel”dən Pap Quyenin hesab arasındakı fərqi artırmasına Quqeşaşvili mane olub. 23 yaşlı qolkiper yaxın məsafədən topun qapıdan keçməsinə imkan verməyib. 65-ci dəqiqədə rəqibin müdafiədəki səhvindən istifadə edən Zubir topu Vadjiyə ötürüb. Sonuncunun qüvvətli zərbəsini Mandanda çətinliklə dəf edə bilib. 79-cu dəqiqədə Bayramovun ötürməsindən sonra Kadi Borges topu dabanı ilə qapıya göndərməyə çalışsa da, təcrübəli qolkiper zərbənin qarşını ustalıqla alıb. Daha sonra yan xətt hakimi bayrağını qaldıraraq, oyundankənar vəziyyət olduğunu bildirib. 83-ci dəqiqədə Patrik Andradenin zərbəsi qüvvətli alınsa da, dəqiqlik çatmayıb. 85-ci dəqiqədə “Qarabağ” buraxılan toplardan birinin əvəzini çıxıb. Andradenin istiqamətində iti ötürməsindən sonra Kadi Borges topu qapıdan keçirib. 90-cı dəqiqədə Dmitri Payetin cərimə zərbəsini Quqeşaşvili dəf edib. Davamında isə top qapı tirindən geri qayıdıb. Lakin Payet əsas vaxta əlavə olunmuş 2-ci dəqiqədə qonaqları 3-cü dəfə meydanın mərkəzinə dəvət edib.

Qeyd edək ki, komandalar arasında cavab qarşılaşması fevralın 24-də Bakıda keçiriləcək

01:40

Fransada "Marsel" və "Qarabağ" komandaları arasında UEFA Konfrans Liqasının pley-off mərhələsinin ilk oyununda 3-cü qol vurulub.

Manset.az-ın məlumatına görə, 85-ci dəqiqələrdə kadi Borges buraxılan toplardan birinin əvəzini çıxıb.

01:01

Fransada "Marsel" və "Qarabağ" komandaları arasında UEFA Konfrans Liqasının pley-off mərhələsinin ilk oyununda 2-ci qol vurulub.

Manset.az-ın məlumatına görə, meydan sahiblərinin heyətində Arkadiuş Milik 44-cü dəqiqədə dubl edib.

00:40

Fransada "Marsel" və "Qarabağ" komandaları arasında UEFA Konfrans Liqasının pley-off mərhələsinin ilk oyununda hesab açılıb.

Manset.az-ın məlumatına görə, 41-ci dəqiqədə Arkadiuş Milik meydan sahiblərini önə keçirib.

00:00

Azərbaycanın avrokuboklardan yeganə təmsilçisi “Qarabağ” bu gün Avropa Konfrans Liqasının pley-off mərhələsi çərçivəsində ilk oyununa çıxacaq.

Manset.az xəbər verir ki, Qurban Qurbanovun komandası Fransada “Marsel”lə üz-üzə gələcək.

“Velodrom” stadionunda keçiriləcək oyunu Monteneqrodan olan hakimlər briqadası idarə edəcək.

Ağdam təmsilçisi tarixində ilk dəfə avrokuboklarda pley-off mərhələsinə yüksəlib. Bu, həm də, Azərbaycan futbolu tarixində ilkdir. “Qarabağ” çətin səfər matçından sərfəli nəticə ilə qayıtmağa çalışacaq. Baxmayaraq ki, rəqib Fransanın köklü klublarından biridir və Liqa 1-də PSJ-dən sonra 2-ci pillədə qərarlaşıb.

Avropa Konfrans Liqası
Pley-offun ilk oyunu
17 fevral

00:00. Marsel – Qarabağ
Baş hakim: Nikola Dabanoviç (Monteneqro).
Fransa, “Velodrom” stadionu.

***

Konfrans Liqasının pley-off mərhələsinin ilk oyunu çərçivəsində bu gecə keçiriləcək "Marsel" - "Qarabağ" matçı üçün heyətlər açıqlanıb.

Komandalar matça aşağıdakı tərkibdə çıxacaqlar:

"Marsel": 30. Stiv Mandanda, 29. Pol Lirola, 5. Leonardo Balerdi, 4. Bubakar Kamara, 3. Alvaro, 14. Luan Peres, 17. Cengiz Ünder, 8. Gerson, 22. Pape Qeye, 20. Konrad De La Fuente, 9. Arkadiuş Milik

Ehtiyat oyunçular: 1. Simon Nqapanduentpu, 16. Pau Lopes, 2. Vilyam Saliba, 6. Matteo Genduzi, 7. Amin Arit, 10. Dmitri Payet, 12. Bamba Dyenq, 13. Sedrik Bakambu, 15. Due Çaleta-Tsar, 23. Sead Kolaşinats, 31. Yuqo Bertelli, 46. Aylan Benyahya Tani

"Qarabağ": 23. Luka Quqeşaşvili, 5. Maksim Medvedev, 81. Kevin Medina, 29. Marko Veşoviç, 27. Toral Bayramov, 2. Qara Qarayev, 6. Patrik Andrade, 19. Filip Ozobiç, 20. Kadi Borges, 10. Abdella Zubir, 25. İbrahima Vadji

Ehtiyat oyunçular: 12. Emil Balayev, 89. Amin Ramazanov, 7. Riçard Almeyda, 13. Bəhlul Mustafazadə, 15. Leandro Andrade, 18. İsmayıl İbrahimli, 22. Musa Qurbanlı, 30. Abbas Hüseynov, 44. Elvin Cəfərquliyev, 55. Bədavi Hüseynov, 77. Ramil Şeydayev, 97. Rüstəm Əhmədzadə