ABŞ səfiri Şuşaya getməkdən niyə imtina edib? – Səfirlikdən AÇIQLAMA Manset.az

ABŞ səfiri Şuşaya getməkdən niyə imtina edib? – Səfirlikdən AÇIQLAMA

00:47 - 13 İyul 2021

ABŞ, Rusiya və Fransa səfirləri Azərbaycan hökumətinin diplomatik korpusla birgə ikinci Qarabağ müharibəsi zamanı azad edilmiş Şuşa şəhərinə dəvətinə məhəl qoymayıblar. ATƏT-in Minsk Qrupu həmsədr dövlətlərinin mövqeyi Azərbaycanda ictimai etiraza səbəb olub.

Manset.az xəbər verir ki, bununla əlaqədar haqqin.az saytının redaksiyası ABŞ-ın Azərbaycandakı səfiri Earl Litzenbergerdən sualları cavablandırmasını xahiş edib. ABŞ səfirliyinin cavablarını oxucularımıza təqdim edirik.

Qeyd edək ki, redaksiya Rusiya və Fransa səfirlərinə də suallar ünvanlayıb.

- Niyə hökumətin Şuşaya ziyarət dəvətini rədd etdiniz?
- Səfirin cədvəli və ya müəyyən tədbirlərdə iştirak edə bilməməsinin səbəbləri ilə bağlı detalları şərh etmirik. Qeyd etmək istərdik ki, cümə günü Bakıda Füzuli və Şuşaya gedə bilməyən bir sıra diplomatik nümayəndəliklərin nümayəndələri var idi.

- ABŞ Rusiyaya qarşı müxtəlif sanksiyalar tətbiq edir. Niyə ABŞ Dağlıq Qarabağ məsələsində Rusiyanın konsolidasiya edilmiş mövqeyi ilə həmrəy davranır?
- ABŞ 2014-cü ildə Rusiyaya qarşı Ukrayna ərazilərini işğalı, zərərli kiber fəaliyyətlər və terrorla mübarizə əməliyyatları, insan alveri, silah yayılması və digər zərərli fəaliyyətlərə görə sanksiyalar tətbiq etdi.
ABŞ Rusiya ilə qarşıdurma axtarmır. Rusiyanın daha sabit və proqnozlaşdırılan ikitərəfli münasibətlər qurmağımızı təmin edəcək qaydalara əsaslanan beynəlxalq öhdəlik modelinə qayıdacağı günü səbirsizliklə gözləyirik. ABŞ sanksiyalar, silahların azaldılması və iqlim dəyişikliyi kimi qarşılıqlı və qlobal maraq kəsb edən məsələlərdə Avropada Təhlükəsizlik və Əməkdaşlıq Təşkilatının (ATƏT) Minsk qrupunun həmsədrləri olaraq Rusiya ilə əməkdaşlığı istisna etmir.

- Niyə Minsk Qrupunun üç həmsədri - ABŞ, Rusiya və Fransa səfirləri eyni mövqedən çıxış edərək 9 iyulda Şuşaya səfər dəvətini rədd etdilər?
- Səfirimizin cədvəlinin təfərrüatlarını şərh etmirik. Digər səfirliklərlə bağlı ətraflı məlumat üçün Fransa və Rusiya səfirləri ilə əlaqə saxlamağınızı tövsiyə edirik.