Almaniya HIMARS raket sistemlərinin istehsalına başlaya bilər Manset.az

Almaniya HIMARS raket sistemlərinin istehsalına başlaya bilər

23:42 - 29 Yanvar 2023

Alman silah istehsalçısı Rheinmetall Ukraynada və Qərbdə güclü tələbatı ödəmək üçün tank və artilleriya sursatlarının istehsalını əhəmiyyətli dərəcədə artırmağa hazırdır və Almaniyada HIMARS reaktiv raket sistemlərinin istehsalına başlaya bilər.

Manset.az xəbər verir ki, bu barədə Reuters agentliyinə baş direktor Armin Papperger məlumat verib.

Rheinmetall bir sıra müdafiə məhsulları istehsal edir, lakin çox güman ki, Leopard 2 tankı üçün 120 mm-lik top istehsalı ilə tanınır: “Biz ildə 240.000 tank mərmi (120 mm) istehsal edə bilərik ki, bu da dünyanın ehtiyac duyduğundan çoxdur”.

O əlavə edib ki, 155 mm-lik artilleriya mərmilərinin istehsal gücü ildə 450-500 min ədədə qədər artırıla bilər ki, bu da Rheinmetall-ı hər iki növ sursatın ən böyük istehsalçısına çevirəcək.

Papperger-ə görə, 2022-ci ildə Rheinmetall 60.000 ilə 70.000 arasında tank və artilleriya mərmisi istehsal edib. Lakin o, istehsalın dərhal artırıla biləcəyinə əmin edib.

Papperger bildirib ki, məsələn, Ukraynada Almaniyanın Gepard zenit tanklarında istifadə edilən orta çaplı döyüş sursatları üçün yeni istehsal xətti ilin ortalarına qədər işə salınacaq.

Eyni zamanda, Rheinmetall Ukrayna qüvvələri tərəfindən fəal şəkildə istifadə edilən HIMARS (High Mobility Artillery Rocket System) çoxlu buraxılış raket sistemlərini istehsal edən Amerika şirkəti Lockheed Martin ilə danışıqlar aparır, Papperger bildirib.

“Münhen Təhlükəsizlik Konfransında biz HIMARS (Almaniya) istehsalına başlamaq üçün Lockheed Martin ilə razılığa gəlməyi hədəfləyirik” - deyə qeyd edib.

"Bizim döyüş başlıqları, eləcə də raket mühərrikləri hazırlamaq texnologiyamız var və buraxılış qurğularını quraşdırmaq üçün yük maşınlarımız var" deyən Papperger, müqavilənin bir neçə yüz milyon avroluq sərmayəni əhatə edə biləcəyini və bunun böyük bir hissəsini Rheinmetall-ın maliyyələşdirəcəyini söyləyib.

Rheinmetall həmçinin Şərqi Almaniyanın Saksoniya əyalətində yeni barıt fabrikini işə salmağı da nəzərdən keçirir, lakin 700 milyon ilə 800 milyon avro arasında sərmayənin Berlindəki hökumət tərəfindən maliyyələşdirilməsi lazım olduğunu söyləyib.

“Dövlət investisiya qoymalıdır, biz öz texnoloji biliklərimizi gətiririk. Bunun müqabilində dövlət zavodda pay və onun əldə etdiyi mənfəəti alır”, - Papperger təklif edib. “Bu, sənaye üçün təkbaşına mümkün olmayan bir investisiyadır. Bu, milli təhlükəsizliyə sərmayədir”.

O qeyd edib ki, zavodun yaradılması zəruridir, çünki xüsusi barıtların istehsalında çatışmazlıq darboğaz yarada bilər və tank və artilleriya mərmilərinin istehsalını artırmaq səylərini ləngidə bilər.

Yeni müdafiə naziri ilə görüşdən bir neçə gün əvvəl Papperger Almaniyanın müdafiə büdcəsinin artırılmasını tələb edib. “Müdafiə büdcəsindəki 51 milyard avro ehtiyacınız olan hər şeyi almaq üçün kifayət deyil. Və 100 milyard avroluq xüsusi fonddan pul artıq ayrılıb və inflyasiya qismən təsir edib. 100 milyard avro nəhəng bir məbləğ kimi səslənir, amma əslində ehtiyacımız olan hər şeyi sifariş etmək üçün 300 milyard avroluq bir paketə ehtiyacımız olacaq". Onun sözlərinə görə, 100 milyardlıq xüsusi fondun sursat alışını əhatə etmir.

Papperger hesab edir ki, Bundesver (Almaniya silahlı qüvvələri) sursat çatışmazlığını doldurmaq üçün ildə üç-dörd milyard avro arasında sərmayə qoymalıdır.