<

ADU-da Çin xəttatlığının tədrisi haqqında seminar keçirildi

15:28 - 16 Yanvar 2023

ADU-da Çin xəttatlığının tədrisi haqqında seminar keçirildi

Azərbaycan Dillər Universitetinin (ADU) Konfutsi İnstitutunda “Çin dilinin tədrisində xəttatlığın rolu” mövzusunda tədris-metodik seminar keçirilib. Seminarı giriş sözü ilə açan ADU Konfutsi İnstitutunun direktoru Rafiq Abbasov Çin dilinin öyrənilməsi prosesinə nəzəri, praktiki və kombinə edilmiş xəttatlıq dərslərinin daxil edilməsinin səmərəliliyini qeyd etmiş, bu dərslərin tələbələrin dilə marağının artırılması, diqqətinin cəmlənməsində, həmçinin  mürəkkəb heroqlifləri yadda saxlamaq prosesini asanlaşdırmaq və heroqlif yazının müxtəlif üsullarının mənimsənilməsində əhəmiyyətini vurğulayıb.

 

Manset.az xəbər verir ki, xəttatlıq dərsləri şagirdlərdə dil və mədəni biliklərin formalaşmasına, Çin dilinin tarixinə marağın genişlənməsinə və ənənəvi Çin mədəniyyətinin dərk edilməsinə töhfə verməklə yanaşı, onların yaddaşı, məntiqi, bədii zövqü və məkan təxəyyülünü də inkişaf etdirir. 

Seminarda çıxış edən ADU-nun Çin dili müəllimi Kəmalə Məmmədova xəttatlığın tədrisinin fəlsəfi-estetik aspektləri, xəttatlıq kursunun əsas mövzuları, o cümlədən Çin yazısının tarixi və islahatları, heroqliflərin mənşəyi haqqında əfsanələrdən, xəttatlığın əsas qaydaları və Çin dili düymələrinin təsnifatı haqqında məlumat verib.

Seminarda çıxış edən ADU-nun Çin dili müəllimi Natəvan Hüseynova Çin yazısının əsas üslubları - Zhuan, Lishu, Kaishu, Caoshu, Xingshu, heroqliflərin fırça ilə yazılması texnikası və qaydaları, kağız, fırça və mürəkkəb növləri haqqında danışıb. Sonra xəttatlığın tədrisində heroqliflərin çapı üçün müxtəlif kompüter proqramlarından istifadə edilməsi, ən populyar və əyləncəli heroqliflər üzrə xəttatlıq ustad dərslərinin keçirilməsinin vacibliyi ilə bağlı müzakirələr aparılıb.


Xəbər xətti

30 Yanvar 2023

Ən son xəbərləri səhifəmizdən də izləyin