GƏNC MƏŞQÇİMİZİN UĞURLARI... Emin Əbilov Manset.az

GƏNC MƏŞQÇİMİZİN UĞURLARI... Emin Əbilov

10:51 - 24 Yanvar 2022

Rayonumuzda gənclər arasında idmana olan maraq çox yüksək səviyyədədir. Belə gənclərimizdən biri də Emin Musa oğlu Əbilovdur.

Manset.az xəbər verir ki, Emin Əbilov 21 oktyabr 1988-ci ildə Sədərək rayonunun Sədərək kəndində ziyalı ailəsində dünyaya göz açıb. 1995-ci ildə Sədərək kənd 1 nömrəli tam orta məktəbin 1-ci sinfinə daxil olub. Orta məktəb vaxtlarından idmana olan marağı onu yoldaşlarından fərqləndirib. 1999-cu ildə artıq voleybol məşqlərinə başlayıb. Eminin idmana olan marağının birsəbəbi də atasının idman müəllimi olması idi. Rayonun yığma voleybol komandasının üzvü kimi bir sıra yarışlarda iştirak edib, komandanın uğur qazanmasında əsaslı rol oynayıb. İdmanla yanaşı, orta məktəb fənlərini də yüksək səviyyədə mənimsəyən Emin 2006-cı ildə məktəbi bitirib.

2012-ci ildə Azərbaycan Bədən Tərbiyəsi və İdmanAkademiyasına daxil olub. 2002-2004-cü illərdə məktəblilər və böyüklərdən ibarət rayon yığma komandasında Naxçıvan çempionluğunu qazanıb. 2004-cü ildə Naxçıvan Milli komandasına üzv seçilən Emin 2006-cı ilə kimi burada fəaliyyət göstərib. Həmin il Azərbaycanın kişilərdən ibarət olan “Metro” yığma komandasına təklif alıb. Hərbi xidməti bitirdikdən sonra həmin komandada çıxış etməyə başlayıb. 2009- cu ildə “Neftçi” voleybol klubunda çıxış edən Eminin komandası Azərbaycan çempionu olub. Daha sonralar kariyerasını məşqçi kimi davam etdirmək qərarına gəlib.

2014-cü ildən qadınlardan ibarət “Azərreyl” voleybol komandasında köməkçi məşqçi vəzifəsində fəaliyyətə başlayıb. 2016-ci ildə köməkçi məşqçi kimi çıxış etdiyi həmin komanda Avropa liqasında qızıl medal qazanıb. 2017-ci ildən Azərbaycanın qadın voleybol klubu olan “Azərreyl” voleybol klubunun məşqçisi, qadın voleybolçulardan ibarət Azərbaycan millisində isə köməkçi məşqçi kimi fəaliyyət göstərib. Həmin dövrdə Emin Əbilovun komandası İslam Həmrəylik Oyunlarında qızıl medala layiq görülüb, Avropa çempionatında 4-cü yeri tutaraq dünya çempionatına vəsiqə qazanıb.

2018-ci ildə Yaponiyada keçirilən dünya çempionatında iştirak ediblər. Həmin çempionatda 205 ölkə arasında 10-cu yerin sahibi olublar. 2019-cu il Olimpiya oyunlarının seçmə mərhələsində Braziliyada keçirilən olimpiya oyunlarına vəsiqə qazanıblar.

Emin Əbilov 2021-ci ildə dünyanın ən güclü 3-cü qadınlardan ibarət olan yığma komandası İstanbul “Sarıyer Bələdiyyə Spor Klubu”ndan təklif alıb. Hazırda orada köməkçi məşqçi vəzifəsində çalışır.

Fərhad RZAYEV, "Oğuz Yurdu" qəzeti Naxçıvan