Uşaq və gənclərin fiziki və mənəvi inkişafı Manset.az

Uşaq və gənclərin fiziki və mənəvi inkişafı

15:03 - 13 Yanvar 2025

Hər bir cəmiyyətin və dövlətin gələcəyini indiki uşaqlar və gənclər müəyyən edir. Bu baxımdan, gənc nəslin düzgün tərbiyəsi, fiziki və mənəvi inkişafı, savadlı vətəndaşlar kimi yetişməsi və digər vacib amillər, onların gələcəkdə cəmiyyətə inteqrasiyasına böyük təsir göstərir. Müstəqillik əldə edildiyi ilk gündən etibarən dövlətimiz bu sahəyə xüsusi diqqət ayırır. Son illərdə bu diqqət daha da güclənib. Yeni məktəblərin inşası, mövcud təhsil müəssisələrinin təmiri, idman infrastrukturlarının yenilənməsi və olimpiya komplekslərinin yaradılması bu istiqamətdə atılmış addımlardan yalnız bir neçəsidir.

Mövzu ilə bağlı Manset.az-a açıqlama verən Mili Məclisin deputatı Müşfiq Cəfərov bildirib ki, hazırda dövlət səviyyəsində uşaq və gənclərin mənəvi və fiziki inkişafı üçün geniş şərait yaradılıb:

Kirayə qalmağa məcburam” - Deputat Müşfiq Cəfərov

"Mən düşünürəm ki, hər bir uşağın və gəncin gələcəkdə layiqli vətəndaş kimi yetişməsində onun mənəvi və fiziki tərbiyəsi ilə yanaşı, təhsili də mühüm yer tutur. Bunlar bir-biri ilə mütləq uzlaşmalıdır. Cəmiyyətin inkişafında uşaq və gənclərin fiziki və mənəvi inkişafının əsaslı rol oynadığı nəzərə alınaraq, ölkəmizdə bu sahəyə xüsusi diqqət var. Müstəqilliyini yenidən bərpa edən Azərbaycan üçün uşaq və gənclərin fiziki və mənəvi inkişafı prioritet məsələ olaraq hələ ilk gündən qəbul olunub. Elə ilk gündən də bu sahəyə qayğı göstərilib və son illər bu qayğının, diqqətin daha da artdığı göz önündədir. Bu qayğını hər bir sahədə müşahidə etməkdəyik.

Bu gün də ölkəmizdə uşaq və gənclərin fiziki və mənəvi inkişafı üçün mühüm addımlar atılır. Görülən işlər bunu deməyə əsas verir ki, uşaqların mənəvi inkişafı ölkəmizin əsas prioritetlərindən biridir. Hazırda dövlət səviyyəsində uşaq və gənclərin mənəvi və fiziki inkişafı üçün geniş şərait yaradılıb, onlara hərtərəfli stimul verən qayğı siyasəti mövcuddur.

Bu gün ölkəmizdə gənclər mərkəzləri, uşaqlar, eyni zamanda gənclər üçün yaradıcılıq birlikləri var. Kütləvi olmasa belə, hər rayonda bu mərkəzlər fəaliyyət göstərir. Bu, tamamilə dövlət hesabına həyata keçirilir. Həmin mərkəzlərdə uşaq və gənclərin mənəvi istirahəti və inkişafı üçün kurslar təşkil edilir.

Azərbaycan Prezidenti İlham Əliyev bu gün dövlətin uşaq siyasətini uğurla davam etdirir. Ölkə başçısının rəhbərliyi ilə gənc nəslin təlim-tərbiyəsinin yüksəldilməsinə yönəlmiş çoxsaylı dövlət proqramları qəbul edilib, uşaq hüquqlarının etibarlı təminat mexanizmləri yaradılıb, ölkənin sürətli inkişafı fonunda uşaqların təhsili və intellektual inkişafı istiqamətində mühüm layihələr həyata keçirilib."

Milli Məclisin deputatı Pərvanə Vəliyeva qeyd edib ki, uşaq və gənclərin fiziki və mənəvi inkişafı sağlam və davamlı cəmiyyət quruculuğunun təməlini təşkil edir:

"Uşaq və gənclərin fiziki və mənəvi inkişafı cəmiyyətin sağlam və davamlı gələcəyi üçün mühüm əhəmiyyət daşıyır. Bu istiqamətdə dövlət, təhsil müəssisələri, ailələr və ictimaiyyətin birgə səyləri ilə kompleks yanaşma tələb olunur.

Bu məqsədlə müxtəlif layihələrin həyata keçirilməsi də vacibdir. İdmanın və sağlam həyat tərzinin təşviqi üçün uşaqlar və gənclər üçün idman mərkəzlərinin yaradılması, təbiət düşərgələrinin təşkili və rəqəmsal savadlılıq proqramlarının həyata keçirilməsi mühüm addımlardır. Eyni zamanda, psixoloji dəstək proqramları, incəsənət və mədəniyyət dərnəkləri uşaqların mənəvi inkişafına dəstək verə bilər.

Beynəlxalq təcrübədən öyrənərək bu istiqamətdə daha effektiv addımlar atıla bilər. Məsələn, Finlandiya və Sinqapurun STEM təhsili sahəsindəki uğurlu nümunələri və Skandinaviya ölkələrinin sağlamlıq proqramları gənclərin hərtərəfli inkişafı üçün uyğun modellərdir.

Dövlətimiz bu sahədə bir çox mühüm tədbirlər həyata keçirir. Bölgələrdə idman komplekslərinin inşası, məktəblərdə sağlamlıq və idman dərslərinin təşviqi, milli-mənəvi dəyərlərin qorunması məqsədilə xüsusi proqramların həyata keçirilməsi və psixoloji xidmətlərin genişləndirilməsi bu səylərin bir hissəsidir. Gənclərin yaradıcılıq potensialını üzə çıxarmaq üçün dövlət tərəfindən müxtəlif fondlar və təşəbbüslər dəstəklənir.

Orta və ali təhsil müəssisələri də bu prosesdə mühüm rol oynayır. Məktəblərdə idman dərslərinin saatlarının artırılması, burada sağlam həyat tərzinin təbliği, universitetlərdə tələbə klublarının yaradılması və incəsənət, idmanla bağlı fəaliyyətlərin təşkili uşaqların fiziki və mənəvi inkişafını dəstəkləyir.

Bu məsələdə valideynlərin də üzərinə böyük məsuliyyət düşür. Uşaqlarını idmana və yaradıcı fəaliyyətlərə təşviq etmək, təhsillərinə dəstək olmaq və onların emosional ehtiyaclarını anlamaq valideynlərin əsas öhdəliklərindəndir. Valideynlər, həmçinin, uşaqların texnologiyadan balanslı istifadə etməsinə nəzarət etməli və onlara milli-mənəvi dəyərləri aşılamaq üçün çalışmalıdırlar".

Sara Məmmədli

6.3.19. uşaq və gənclərin fiziki və mənəvi inkişafı;

Yazı Medianın İnkişafı Agentliyinin maliyyə dəstəyi ilə hazırlanıb