Soyuqdəymə zamanı bu dərmanları atmaq olmaz

Soyuqdəymə zamanı bu dərmanları atmaq olmaz - Diqqət

08:30 - 18 Oktyabr 2024

Antibiotiklər bakterial infeksiyaların müalicəsi üçün istifadə olunan dərmanlardır. Onların təsir göstərmə prinsipi mikroorqanizmlərin böyüməsini dayandırmaq və ya onları öldürməkdir. Antibiotiklərin əsas məqsədi bakterial infeksiyaların müalicəsi, infeksiyaların qarşısını almaq, xroniki infeksiyaların idarə edilməsi, digər dərmanlarla birgə istifadə edilməsi və bakteriyaların bioloji xüsusiyyətlərini öyrənməkdir. Bununla belə, antibiotiklərin yanlış istifadəsi bakteriyalarda müqavimət inkişafına səbəb ola bilər, buna görə də onların yalnız həkim tövsiyəsi ilə və lazım olduğu zaman istifadə edilməsi vacibdir.

Manset.az Milli.az-a istinadən antibiotik qəbul edənlərə tövsiyələri təqdim edir, məsləhətlərə əməl etməklə həm sağlamlığınızı qoruya, həm də antibiotiklərin səmərəsini təmin edə bilərsiniz:

Həkim tövsiyəsi olmadan antibiotik qəbul etmək olmaz:

Antibiotiklər yalnız bakterial infeksiyalar üçün təsirlidir. Viruslar, məsələn, soyuqdəymə və qrip zamanı antibiotiklər işə yaramır.

Müalicə kursunu tamamlamaq:

Antibiotik qəbuluna başlayanda həkim tərəfindən müəyyən edilmiş kursu hətta özünüzü yaxşı hiss etsəniz belə tamamlamaq çox vacibdir. Erkən dayandırmaq infeksiyanın tam müalicə olunmamasına və bakteriyaların müqavimət göstərməsinə səbəb ola bilər.

Antibiotik dozasına diqqət yetirmək:

Tövsiyə olunan dozanı düzgün vaxtda qəbul etmək lazımdır. Dozaları atlamaq və ya səhv vaxtda qəbul etmək antibiotiklərin təsirini azalda bilər.

Alkoqoldan uzaq durmaq lazımdır:

Antibiotik müalicəsi zamanı alkoqol qəbul etmək bəzi dərmanlarla reaksiyaya girə bilər və müalicənin effektliyini azalda bilər.

Əks təsirlər:

Bəzi antibiotiklər mədə-bağırsaq problemlərinə və ya allergik reaksiyalara səbəb ola bilər. Hər hansı bir narahatlıq varsa, dərhal həkimə müraciət etmək lazımdır.

Antibiotiklərinizi başqalarına verməyin:

Antibiotiklər hər kəs üçün fərqli dozada və növdə təyin olunur. Başqalarının dərmanını istifadə etmək və ya öz dərmanlarını başqaları ilə bölüşmək təhlükəlidir.

Antibiotik nə vaxt qəbul edilir?

Antibiotiklərin qəbul vaxtı, onların növündən və həkiminiz tərəfindən verilən tövsiyələrdən asılıdır. Hər bir antibiotikin spesifik istifadəsi və zamanlama prinsipləri vardır. Buna görə də, ən doğru məlumat üçün mütləq həkiminizlə danışın. Antibiotiklərin düzgün vaxtda və şəkildə qəbulu onların effektivliyini artırır və əks təsirləri azaltmağa kömək edir. Antibiotiklərin qəbulunda zamanlama vacibdir. Məsələn, əgər həkim gündə üç dəfə qəbul etməyi tövsiyə edibsə, dozanı 8 saat aralığında qəbul etməyə çalışmalısınız. Bu, dərmanın qan dövranında sabit səviyyədə qalmasına kömək edir.

Bəzi antibiotiklər mədə bağırsaq sistemində daha yaxşı sorulması üçün yeməkdən əvvəl, digərləri isə yeməkdən sonra qəbul edilməlidir.

Əgər bir dozanı unutsanız, mümkün olan ən qısa müddətdə qəbul etməyə çalışın. Lakin, əgər növbəti doza vaxtı gəlmişsə, unudulmuş dozanı atlayın və yalnız növbəti dozanı qəbul edin. İkiqat doza qəbul etməyin.

Antibiotiki bol su ilə qəbul etmək, onun mədədə daha yaxşı həll olunmasına kömək edir.