Bəşər tarixinin hər bir mərhələsində özünün təsdiqini tapan faktorlardan biri siyasi lider amilinin dövlətlərin və xalqların taleyində böyük rol oynamasıdır. İnsanları milli amallar və dövlətçilik idealları ətrafında birləşdirməyi bacaran liderlər tarixin axarı ilə getməmiş, işıqlı əməlləri, yüksək siyasi dünyagörüşləri və vətən sevgiləri ilə öz ölkələrinin qürur salnamələrini yaratmış və təmsil etdikləri xalqların böyük şəxsiyyətlərinə çevrilmişlər.
Müasir Azərbaycan Respublikasının dövlət
müstəqilliyinin bərpası, onun möhkəmləndirilməsi və beynəlxalq aləmdə nüfuzunun
artırılması bilavasitə ümummilli lider Heydər Əliyevin adı ilə bağlıdır. XX
əsrin sonlarında ölkəmizdə hökm sürən siyasi, iqtisadi və sosial böhran,
idarəetmədə xaos, Ermənistanın təcavüzü nəticəsində yaranan humanitar və ərazi
problemləri, xalqın dövlətə olan inamının sarsılması fonunda Azərbaycan bir
dövlət kimi məhv olmaq təhlükəsi ilə üz-üzə qalmışdı. Məhz belə bir dövrdə
xalqın təkidli tələbi ilə yenidən hakimiyyətə qayıdan Heydər Əliyev, əsl
mənada, ölkəni dağılmaqdan, dövlətçiliyi məhv olmaqdan xilas etdi.
Anadan olmasının 102-ci ildönümü ərəfəsində xatirəsini böyük minnətdarlıq hissi ilə qeyd etdiyimiz
Ulu Öndər Heydər Əliyevin də adı məhz belə xalqının tarixini yaradan böyük
liderlər, əbədiyaşarlıq qazanmış şəxsiyyətlər cərgəsində yer alır. Heydər
Əliyevin timsalında Azərbaycan xalqı bəşər tarixinə öz imzasını həkk edən dahi
bir şəxsiyyət yetirmişdir. Doğma xalqının önündə cəsarətlə addımlayan Heydər
Əliyev dövlətçiliyimizin banisi, millətin böyük öndəri kimi ali bir zirvəyə
ucalmışdır.
Ümummilli lider Heydər Əliyev elə bir dühadır ki, onun
fəaliyyətinə nəzər salanda Azərəbaycanın böyük bir tarixi epoxası barədə fikir
yürütmək olur. Başqa cür desək, Heydər Əliyev elə bir zirvədir ki, onun
ucalığından müasir Azərbaycanın yüksəlişi, intibahı, müstəqilliyi, qüdrətli
dövlətçiliyi, xalqımızın milli həmrəyliyi, həmçinin böhrandan inkişafa, xaosdan
tərəqqiyə keçid aydın görünür. Ulu Öndərin sovet hakimiyyəti dövründə və
müstəqillik illərində respublikamıza rəhbərliyi məhz cəmiyyəti narahat edən problemlərə
son qoyulması, tənəzzülün, geriləmənin, nöqsanların qarşısının alınması,
inkişafın təmin olunması və ən əsası sarsılmaz müstəqilliyimizin, qüdrətli
dövlətçiliyimizin etibarlı təməllərinin yaradılması ilə əlamətdar olub.
Ona görə ulu öndər Heydər Əliyevin həm
sovet illərində, həm müstəqillik dövründə Azərbaycana rəhbərliyə başlaması
tariximizin dönüş nöqtəsi kimi də nəzərdən keçirilir. Birinci mərhələdə
Azərbaycanın öz iqtisadi göstəricilərinə görə keçmiş ittifaqın geridə qalmış
ölkələri sırasından qabaqcılları cərgəsinə çıxmasına nail olan Heydər Əliyev
özünün müdrik rəhbərliyi ilə xalqımızı nəinki sovetlər birliyinə, bütün dünyaya
tanıtdı. Sovet dövlətinin sərt ideoloji tələblərinin hakim olduğu bir şəraitdə
Heydər Əliyevin həyata keçirdiyi tədbirlər xalqımızın milli oyanışına yol açdı,
milli-mənəvi dəyərlərimizin unudularaq itirilməsinin qarşısını aldı.
Ulu öndər Heydər Əliyevin Azərbaycana birinci
rəhbərlik dövrü həm də respublikamızda qanunçuluğun möhkəmləndirilməsi, hüquqi
islahatlar çərçivəsində xalqımızın milli maraqlarının təmin olunması ilə
əlamətdardır. İnkişaf hədəflərini düzgün müəyyənləşdirən Ulu Öndər buna uyğun
olaraq korrupsiya əməllərinin, o cümlədən rüşvətxorluğun qarşısının alınması
üçün sərt tədbirlər həyata keçirdi. Təbii ki, bu tədbirlər respublikamızda
inkişafa maneçilik yaradan buxovların qırılıb atılmasına, cəmiyyətimizin mənəvi
sağlamlığının təmin olunmasına uğurla xidmət etdi, müsbət nəticələri oldu.
Hüquqi islahatlar çərçivəsində isə yalnız bir məqamı -
1978-ci ildə qəbul edilən Azərbaycan SSR-nin Konstitusiyasında yer alan
müddəaları misal çəkməklə Ulu Öndərin nümunəsində dövlətə və xalqa layiqli
xidmətin ali nümunəsini göstərə bilərik. Sovet dövlətinin xalqları öz
keçmişlərindən, ənənələrindən, tarixlərindən uzaqlaşdırmağa yönəlik siyasət
yürütdüyü, milli dəyərləri unutdurmağa çalışdığı bir dövrdə qəbul edilən
Azərbaycan SSR-nin Konstitusiyasında yer alan məqamlar milli və mənəvi
dəyərlərimizin qorunması üçün hüquqi əsasları daha da gücləndirdi. Bu sırada
Azərbaycan dilinin dövlət dili kimi təsbit olunması Heydər Əliyevin sovet
illərində xalqımız qarşısındakı xidmətlərinin ən möhtəşəm nümunələrindən
biridir.
Xalqımızın dahi övladının 1982-ci ilin noyabr ayında
Sovet İttifaqının siyasi kursunu müəyyənləşdirən ən ali orqana - Siyasi Büroya
üzv seçilməsi, həmçinin həmin ərəfədə SSRİ Nazirlər Soveti sədrinin birinci
müavini təyin olunması onun Azərbaycana uğurlu rəhbərliyinin nəticəsi idi. Eyni
zamanda Ulu Öndərin SSRİ kimi fövqəldövlətin rəhbərləri sırasında yer alması
onun dövlət xadimi kimi səriştəsinin, təcrübəsinin, ən əsası, nüfuzunun ittifaq
miqyasında etiraf olunması idi.
Ümummilli Liderin siyasi karyerasının bu yüksəlişi həm
də xalqımızın möhtəşəm nailiyyəti idi. Çünki bu vəzifədə Heydər Əliyev bir
azərbaycanlı kimi öz xalqını ali zirvədə təmsil edirdi. Bu dövrdə SSRİ kimi
böyük bir dövlətin mühüm iqtisadi və sosial sferalarını kurasiya edən Heydər
Əliyev doğma vətəninə də yetərincə diqqət ayırırdı.
Sovet illərində özünün müdrik rəhbərliyi sayəsində
Azərbaycanın iqtisadi inkişafına və milli intibahına nail olan, həyata
keçirdiyi tədbirlərlə respublikamızın etibarlı gələcəyinin möhkəm təməllərini
yaradan Heydər Əliyev sonrakı dövrdə də xalqımızı çətin sınaqlardan,
böhranlardan layiqincə çıxarmış, öz əməlləri ilə tariximizin növbəti şərəfli
səhifələrini yazmışdır. Bu baxımdan, ilk növbədə, onu qeyd etmək yerinə düşər
ki, 1987-ci ilin sonlarına yaxın M.Qorbaçovun yürütdüyü siyasətə etiraz edərək
bütün vəzifələrindən istefa verən Heydər Əliyev həmin dövrdə də öz xalqının
yanında olmuş, xüsusən Naxçıvanda həyata keçirdiyi siyasi fəaliyyətlə
milli-azadlıq hərəkatının daha da güclənməsinə layiqli töhfələrini vermişdir.
Bu illərdə Heydər Əliyevin liderliyi və təşəbbüsü ilə Naxçıvanda üçrəngli
bayrağımızın dövlət bayrağı elan olunması, ilk dəfə 20 Yanvar hadisələrinə
dəqiq siyasi-hüquqi qiymətin verilməsi, SSRİ-nin saxlanılması ilə bağlı
referendumun muxtar respublikada boykot edilməsi Ulu Öndərin qətiyyətinin və
vətənpərvərliyinin göstəriciləri kimi tariximizin böyük siyasi hadisələridir.
Məhz Heydər Əliyevin bu kimi cəsarətli addımları xalqımızın milli-azadlıq
mücadiləsini yeni mərhələyə yüksəltmiş, müstəqilliyimizə gedən yolumuza işıq
salmışdır.
Ağır və gərgin təbəddülatlarla dolu 1993-cü ildə
müstəqilliyimizin və dövlətçiliyimizin xilas edilməsi isə Heydər Əliyevin
uzaqgörən və parlaq siyasi zəkasının, vətən sevgisinin növbəti və tarixi
təcəssümü oldu. Ulu Öndərin ikinci dəfə xalqın təkidli tələbi ilə
hakimiyyətə qayıdışı xalqın iradəsinə əsaslanan tarixi bir çağırış idi. 1993-cü
ilin iyun hadisələri zamanı Azərbaycan faktiki olaraq vətəndaş müharibəsi
astanasına gəlmişdi. Gəncədə baş verən hadisələr, ölkədə separatizmin
alovlanması, ordu birləşmələrinin özbaşınalığı və qeyri-peşəkar rəhbərliyin
fəaliyyətsizliyi dövlətçiliyin tam iflasa uğramasına gətirib çıxarırdı. Belə
bir dövrdə xalqın ümidsizliyini ümide çevirən yeganə şəxsiyyət məhz Heydər
Əliyev oldu. 1993-cü ilin 15 iyununda
Heydər Əliyevin Azərbaycan Ali Sovetinin sədri seçilməsi və ardınca prezident
səlahiyyətlərini icra etməyə başlaması ölkənin taleyində dönüş nöqtəsi oldu. Bu
gün 15 iyun – Milli Qurtuluş Günü kimi qeyd olunur və Azərbaycan
dövlətçiliyinin əsas sütunlarından biri sayılır. Ümummilli Lider Heydər
Əliyevin hakimiyyətə qayıdışı ilə ölkədə stabillik bərpa edildi, ordu
quruculuğu sahəsində fundamental islahatlar həyata keçirildi, separatçı
meyillər yatırıldı və dövlət idarəçiliyi mərkəzləşdirildi. Bütün bu addımlar
Azərbaycanın müstəqil dövlət kimi yaşaması və inkişaf etməsi üçün ilkin
şərtləri formalaşdırdı.
Amma bütün cəmiyyətə həm birləşdirici, həm də ümidləri
itməyə qoymayan güclü bir hiss də hakim idi. Bu hiss Ulu Öndər Heydər Əliyevə
olan inamdan irəli gəlirdi. Bütün xalq, hətta haki- miyyətdə olan siyasi
qruplar da bilirdilər ki, respublikamızı düşdüyü dərin böhrandan, üzləşdiyi
təhlükələrdən yalnız görkəmli dövlət xadimi Heydər Əliyev xilas edə bilər. Bu
mənada həmin gərgin günlərdə Heydər Əliyevə ünvanlanan müraciətlər Ulu Öndərə
olan ümumxalq inamının göstəricisi idi. Xalqımızın dahi oğlu o ağır günlərdə öz
siyasi təcrübəsinə, uzaqgörənliyinə söykənərək böyük qətiyyətlə özünün
xilaskarlıq missiyasını yerinə yetirdi. Ulu Öndərin sayəsində Azərbaycanın
dövlət müstəqilliyinin əbədi olması layiqincə təmin edildi, dövlətçiliyimiz
qorundu.
Beləliklə, sovetlər dövründə Azərbaycanın intibahını
təmin edən Ulu Öndər Heydər Əliyev müstəqillik illərində müasir Azərbaycan
dövlətinin banisinə çevrildi. Öz əməlləri ilə xalqımızın Ümummilli Liderinə
çevrilən Heydər Əliyevin müəllifliyi ilə ötən əsrin 90-cı illərinin
ortalarından etibarən müstəqillik salnaməmizin şərəfli səhifələrinin
yazılmasına başlanıldı.Ulu Öndər özünün zəngin siyasi təcrübəsi ilə müasir
dövlətçiliyimizin etibarlı təməllərini yaratdı, respublikamızı beynəlxalq
hüququn tamhüquqlu üzvünə çevirdi. Həyata keçirilən məqsədyönlü islahatlarla
cəmiyyət həyatının bütün sahələrində inkişafın, hüquqi dövlət quruculuğunun
əsası qoyuldu. Qısa zaman ərzində Ulu Öndərin həll etdiyi problemlər həm də
Azərbaycana beynəlxalq miqyasda olan etimadı gücləndirdi və bunun məntiqi
nəticəsi kimi Heydər Əliyevin milli inkişaf strategiyasının əsas sütunlarından
olan "Əsrin müqaviləsi" imzalandı.
Ümummilli Liderin təşəbbüsü ilə həyata keçirilən neft
strategiyası Azərbaycanın iqtisadi inkişafında dönüş nöqtəsinə çevrildi.
1994-cü il sentyabrın 20-də imzalanan “Əsrin müqaviləsi” ilə dünya dövlətləri
və transmilli şirkətlər Azərbaycanın enerji resurslarına sərmayə yatırmağa
başladılar. Bu, bir tərəfdən ölkənin iqtisadi potensialını artırdısa, digər
tərəfdən Azərbaycanın beynəlxalq nüfuzunu gücləndirdi. Ulu Öndərin “Neft
Azərbaycanın milli sərvətidir və bu sərvət xalqımıza xidmət etməlidir” prinsipi
müstəqil iqtisadi siyasətin əsas dayağına çevrildi.
Heydər Əliyev xalqın birliyini və milli həmrəyliyi
Azərbaycanın dövlət müstəqilliyinin əsas təminatçısı kimi qiymətləndirirdi. Bu
səbəbdən də o, vətəndaş cəmiyyəti quruculuğuna və hüquqi dövlətin təməllərinin
möhkəmləndirilməsinə xüsusi diqqət yetirirdi. Ədalətli məhkəmə sisteminin
yaradılması, insan hüquq və azadlıqlarının təminatı, qanunun aliliyinin
qorunması Ulu Öndərin idarəçilik fəlsəfəsinin əsas sütunlarından idi.
Hər bir dövlətin uğurlarının təməlində mütərəqqi
siyasi kurs və təkmil idarəçiliklə yanaşı, bir sıra müxtəlif amillər, o
cümlədən mükəmməl hüquq sisteminin mövcudluğu dayanır. Heydər Əliyevin siyasi
hakimiyyətə qayıdışından sonra respublikamızın daxil olduğu inkişaf yoluna bu
prizmadan nəzər saldıqda görürük ki, həyata keçirilən dövlət quruculuğunun əsas
elementlərindən biri dövrün tələb və çağırışlarından irəli gələrək hüquqi
sistemin tamamilə yenilənməsi olmuşdur. Ulu Öndərin bu sahədə həyata keçirdiyi
islahatlar isə həm mükəmməl hüquqi bazanın formalaşdırılmasını, həm də bu
sahədə müvafiq dövlət qurumlarının fəaliyyətinin yenidən qurulmasını, onların
işinin təkmilləşdirilməsini əhatə etmişdir.
Ulu Öndər özünün zəngin siyasi təcrübəsi ilə müstəqil
Azərbaycanın möhkəm əsaslar üzərində qurulmasına və beynəlxalq arenada layiqli
mövqe qazanmasına nail oldu. Onun rəhbərliyi ilə həyata keçirilən daxili və
xarici siyasət ölkənin siyasi sabitliyini təmin etməklə yanaşı, iqtisadi
inkişafın və hüquqi dövlət quruculuğunun əsasını qoydu. Heydər Əliyevin
təşəbbüsü və rəhbərliyi ilə qəbul olunan 1995-ci il Konstitusiyası müstəqil
Azərbaycan Respublikasının hüquqi-siyasi inkişaf yolunu müəyyənləşdirdi və
ölkənin demokratik dövlət kimi inkişafına hüquqi zəmin yaratdı.
Ulu Öndər Heydər Əliyevin ən böyük xidmətlərindən biri
də milli ideologiyanın formalaşdırılması, gənc nəslin azərbaycançılıq ruhunda
tərbiyə olunması və tarixi yaddaşın qorunması istiqamətində atdığı addımlardır.
O, gəncləri ölkənin gələcəyi hesab edir və daim vurğulayırdı ki, Azərbaycanın
sabahı savadlı, vətənpərvər, milli dəyərlərə sadiq olan gənclərin çiynində
yüksələcək. Bu məqsədlə “Gənclər siyasəti haqqında” dövlət proqramları
hazırlanaraq uğurla həyata keçirildi.
Ulu Öndər həmçinin Azərbaycan diasporasının
gücləndirilməsini, xaricdə yaşayan soydaşlarımızın milli kimliyinin qorunmasını
və onların Azərbaycanla əlaqələrinin möhkəmləndirilməsini daim diqqət
mərkəzində saxlayırdı. Onun təşəbbüsü ilə dünya azərbaycanlılarının
qurultaylarının keçirilməsi beynəlxalq aləmdə milli birliyimizin nümayişi
baxımından tarixi hadisələrə çevrildi.
Heydər Əliyevin dövlətçilik fəlsəfəsində milli
maraqlar hər zaman prioritet olmuşdur. Onun diplomatik manevr bacarığı, çevik
və qətiyyətli qərarları nəticəsində Azərbaycanın beynəlxalq münasibətlər
sistemində mövqeyi gündən-günə möhkəmləndi. Ulu Öndərin yaratdığı və
formalaşdırdığı siyasi məktəb bu gün Prezident İlham Əliyev tərəfindən uğurla
davam etdirilir. Məhz bu siyasi kursun davamıdır ki, Azərbaycanın regionda və
dünyada nüfuzu getdikcə artır, dövlətimiz öz sözünü deyən və qəbul etdirən gücə
çevrilir.
Bütövlükdə, Heydər Əliyev hansı siyasi-ictimai və
iqtisadi dövrdə respublikamıza rəhbərlik etməsindən asılı olmayaraq hər zaman
öz vətəninin və xalqının yüksək rifahı üçün çalışıb. Prezident İlham Əliyevin
"Azərbaycan Respublikasında 2023-cü ilin "Heydər Əliyev İli"
elan edilməsi haqqında" 29 sentyabr 2022-ci il tarixli sərəncamında Ulu
Öndərin respublikamız və xalqımız qarşısındakı tarixi xidmətləri ətraflı təhlil
olunur. Sərəncamda qeyd olunduğu kimi, Heydər Əliyevin zəngin həyat yolu və
müstəsna fəaliyyətinin bütün mərhələləri bir- birini tamamlamış, öz xalqına sıx
bağlılığın, milli dövlətçilik məfkurəsinə sadiqliyin canlı təcəssümü olmuşdur:
"Geniş bilik və dərin təfəkkür sahibi olan Heydər Əliyev düşünülmüş və
cəsarətli qərarları ilə təkcə müstəqillik dövründə deyil, bütün dövrlərdə
Azərbaycan ictimaiyyətini ən ciddi şəkildə düşündürən məsələləri uğurla həll
etmişdir. Ulu Öndər cəmiyyət həyatının müxtəlif sahələri arasında üzvi bağlılığı
aydın görərək, müəllifi olduğu milli inkişaf strategiyasında ictimai, siyasi,
sosial, iqtisadi, mədəni və digər sahələrdə qarşıda duran vəzifələri düzgün
müəyyənləşdirmiş və məharətlə həyata keçirmişdir".
Sərəncamda qeyd olunduğu kimi, dövlətçilik
salnaməmizdə silinməz izlər qoymuş, azərbaycanlı olması ilə ömür boyu fəxr
etmiş, milli qürur və iftixar mənbəyimiz olan Heydər Əliyev bütün dünyada
Azərbaycanın rəmzi kimi qəbul edilir. Xalqımız onun əziz xatirəsini həmişə uca
tutur və minnətdarlıqla anır, yenidən hakimiyyətə gəldiyi günü Azərbaycan
Respublikasının dövlət bayramı Milli Qurtuluş Günü kimi qeyd edir.
Heydər Əliyev elə bir siyasi kurs, elə bir bir inkişaf
strategiyası müəyyənləşdirib ki, onların həyata keçirilməsi Azərbaycana yalnız
yüksəliş və güclü dövlətçilik vəd edir. Bununla yanaşı, Heydər Əliyev həm də
möhtərəm Prezident İlham Əliyevin timsalında özünün layiqli varisini, müəyyən
etdiyi siyasi kursu davam etdirməyə qadir, qətiyyətli və milli dəyərlərə bağlı
lider yetişdirmişdir. Təsadüfi deyil ki, 2003-cü ildə xalqımızı qarşıdan gələn
prezident seçkilərində siyasi varisi İlham Əliyevi dəstəkləməyə çağıran Ulu
Öndər inam hissi ilə bildirirdi ki, yekunlaşdıra bilmədiyi taleyüklü
məsələləri, planları, işləri İlham Əliyev başa çatdıra biləcək.
Ötən 21 ildə Prezident İlham
Əliyevin rəhbərliyi ilə qazanılan hər bir nailiyyət, Azərbaycanın keçdiyi
dinamik inkişaf yolu, qlobal miqyasda söz sahibinə çevrilməsi bir daha Ulu
Öndərin nə qədər müdrik və uzaqgörən olduğunu aydın şəkildə təsdiq edir. Bu
illər ərzində cənab İlham Əliyevin qətiyyətli siyasəti nəticəsində Azərbaycan
öz inkişaf göstəriciləri ilə tarixinin ən qüdrətli dövrünə qədəm qoyub. Qürur
hissi ilə qeyd etməliyik ki, bu gün respublikamız dünya birliyinin nüfuzlu,
etimad göstərilən üzvü, regionun aparıcı dövlətidir. Bütün bunları təmin edən
Prezident İlham Əliyevin adı isə dünyanın ən nüfuzlu siyasi liderləri ilə bir
cərgədə çəkilir.
Heydər Əliyev yolunu qətiyyətlə, layiqincə davam
etdirən Prezident İlham Əliyev Azərbaycanı inkişaf göstəricilərinə və hərbi
gücünə əsasən tarixinin ən qüdrəti dövləti etməklə, Ermənistan tərəfindən işğal
edilmiş torpaqlarının azad olunması üçün də münbit tarixi zəmin yaratdı.
Beləliklə, 44 günlük Vətən müharibəsində və lokal
xarakterli antiterror tədbirləri zamanı qazanılan tarixi zəfərlər, torpaqlarımızın işğaldan azad edilməsi.
suverenliyimizin tam bərpa olunması Azərbaycanın yüksəlişinin, qüdrətinin
və Prezident İlham Əliyevin qətiyyətli siyasətinin təntənəsi oldu. Bu zəfərlərlə Prezident İlham Əliyev, həm də ata vəsiyyətini layiqincə yerinə yetirdi,
Heydər Əliyevin ən böyük arzusunu həyata keçirdi. Ona görə Ulu Öndərin ruhu da
rahatdır. Çünki onun axıra çatdıra bilmədiyi taleyüklü məsələləri layiqli
siyasi davamçısı kimi möhtərəm İlham Əliyev qətiyyətlə həll edir.
Qeyd edək ki, qazanılan Zəfərlərin ideya-siyasi və
mənəvi təməllərində də məhz Ulu Öndər Heydər Əliyevin yaratdığı dövlətçilik
ideologiyası, xalq-dövlət birliyi və güclü ordu quruculuğu dayanır. Prezident
İlham Əliyevin qeyd etdiyi kimi, “Əgər Heydər Əliyev məktəbi olmasaydı, bu gün
biz bu uğurları qazana bilməzdik.” Bu fikirlər ulu öndərin dövlət və xalq
qarşısında xidmətlərinin əsl mahiyyətini və əbədi dəyərini ifadə edir.
Tarixi zəfərlərdən sonra Azərbaycan yeni
inkişaf mərhələsinə qədəm qoyub. Həm işğaldan azad olunmuş torpaqlarımız bərpa
olunur, həm də respublikamızda yeni iqtisadi və sosial inkişaf nümunələri
yaradılır. Bütün bunlar bir daha təsdiq edir ki, Ulu Öndər Heydər Əliyevin ideyaları
həyata vəsiqə alır və ölkəmiz Prezident İlham Əliyevin müdrik rəhbərliyi ilə
daha böyük uğurlara doğru qətiyyətlə addımlayır.
Son
olaraq qeyd edək ki, Ümumilli lider Heydər Əliyev yalnız Azərbaycan
xalqının ümummilli lideri deyil, həm də müasir dövlətçiliyimizin memarı, dövlət
müstəqilliyimizin və suverenliyimizin təminatçısı, millətin siyasi yaddaşında
silinməz iz buraxmış fenomenal şəxsiyyət kimi tariximizdə əbədi yaşayacaqdır.
Onun müəyyən etdiyi strateji yol bu gün də Azərbaycanın gələcək inkişafının yol
xəritəsidir. Azərbaycanın bugünkü uğurları Heydər Əliyev ideyalarının və müdrik
siyasi xəttinin davamı kimi xalqımızın şərəf tarixində öz yerini alır.
Zahid Cəfərov
YAP Yasamal rayonu
“Z.Xəlilov küç.33” (BDU) ünvanı üzrə ərazi partiya təşkilatının sədri, BDU-nun
Hüquq fakültəsinin professoru, h.e.d, Qərbi Azərbaycan İcması İdarə Heyətinin
üzvü, Hüquq Komissiyasının və Böyük Qarakilsə rayon icmasının sədri