Bugün Milli Məclisin Səhiyyə Komitəsində Azərbaycan
Respublikasının Əmək Məcəlləsində, “Əhalinin sağlamlığının qorunması haqqında”,
“Özəl tibb fəaliyyəti haqqında” və “Dərman vasitələri haqqında” Azərbaycan
Respublikasının qanunlarında dəyişiklik edilməsi barədə Azərbaycan
Respublikası Qanununun layihəsinə baxılıb.
Mövzu ilə bağlı Manset.az-a açıqlama verən Milli Məclisin Səhiyyə Komitəsinin üzvü Pərvanə Vəliyeva qeyd edib ki, hazırkı qanun layihəsi tibb mütəxəssislərinin sertifikasiyası ilə bağlı bir çox müsbət dəyişiklikləri özündə ehtiva edir:
"Layihədə əks olunması təklif olunan bəzi məsələlər əvvəllər yalnız Səhiyyə Nazirliyinin qəbul etdiyi normativ sənədlərdə (yəni nazirliyin verdiyi qərarlarla) tənzimlənirdi. Yəni daha aşağı hüquqi qüvvəyə malik idi. Söhbət səhiyyə sahəsində sertifikasiya, verilən kredit ballarından (məsələn, tibbi təhsil və ya davamlı inkişaf üçün toplanan ballar) və onların nə cür yoxlanıldığı və hesablandığından, sınaq imtahanı və s-dən gedir. Bu kimi qaydalar qanunla tənzimlənmirdi. Qanunla tənzimlənmə sui-istifadə hallarından yayınmağa imkan verir və daha aydındır.
Qanun layihəsində beynəlxalq təcrübəyə istinad
olunmuşdur. Belə ki, Dünya Tibb Təhsili Federasiyası tərəfindən standartları
hazırlanaraq tövsiyə edilən davamlı peşəkar inkişafın (DPİ) tətbiqi təklif
olunur."
Millək vəkili onu da qeyd edib ki, qanun layihəsində təklif edilən dəyişiklik və əlavələr içərisində diqqət çəkən bir neçə müsbət məqam var:
"İxtisas dəyişmə ilə bağlı müddəaların artıq qanundan
çıxarılması, sertifikasiyadan keçməyin 2 seçim yolunun təklif edilməsi
Son dövrlərdə həkimlərin ixtisas dəyişdirərək daha çox plastik cərrahiyyə ixtisaslarına yönəlməsinin və bunun ağır fəsadlarının şahidi oluruq. Bu səbəbdən bu hallara sertifikasiya ilə yol verilməməsi məqsədəuyğundur. Şəxs ixtisas dəyişmək istəyirsə, həmin ixtisas üzrə rezidentura keçdikdən sonra bu sahə ilə məşğul ola bilər.
Sertifikasiyanın həyata keçirilməsi üçün təklif olunan yeni üsulla praktiki tibb fəaliyyəti ilə məşğul olan və olmaq istəyən şəxslər davamlı peşəkar inkişaf (DPİ) üsulu ilə elmi, pedoqoji, tədris fəaliyyətləri həyata keçirməlidir. Onlara bu fəaliyyətlərə görə kredit balları veriləcək. Yəni tibb işçisi praktiki tibb fəaliyyəti ilə yanaşı, elmi fəaliyyətlə də məşğuldursa, Səhiyyə Nazirliyi tərəfindən akkreditasiya olunmuş tədbirlərdə, konqreslərdə iştirak edir, məqalələri elmi jurnallarda dərc olunursa, bu, ona kredit balı qazandıracaq. Həmçinin, ali və ya peşə-ixtisas təhsil müəssisəsində və ya digər mərkəzlərdə pedoqoji və tədris fəaliyyəti ilə məşğuldursa, bunun üçün kredit balı veriləcəkdir.
Beləliklə də, tibb mütəxəssisləri yalnız ixtisasartırma kurslarında iştirakla məhdudlaşdırmayaraq onlara peşəkar inkişaf üçün daha geniş imkanlar yaradılır və onlar daim öz üzərində işləməyə motivasiya edilir. Həmçinin, tibb mütəxəssislərinin beynəlxalq peşəkar mühitə inteqrasiyasına şərait yaradır.
Sertifikasiya üçün təklif olunan ənənəvi üsul
isə sertifikasiya imtahanından keçməkdir. Hazırki qanun layihəsi isə sertifikasiya
şəhadətnaməsi əldə etmək üçün daha çevik və effektiv yanaşma təklif edir. DPİ
üzrə fəaliyyətləri olmayan, elmi, pedoqoji, tədris fəaliyyətləri olmayan və ya
bu fəaliyyətlərdən minimum kredit balı toplayan şəxslər də imtahandan keçərək şəhadətnamə
ala bilər. Onu da qeyd edim ki, dəyişikliklər orta tibb işçilərinə də şamil
edilir.
Qanunda daha bir yenilik isə sertifikasiyadan
keçə bilməyən tibb mütəxəssislərinin iş yerinin və vəzifə maaşının qrafik üzrə
6 ay müddətində saxlanılmasıdır ki, bu da tibb mütəxəssislərinin sosial müdafiəsinin
gücləndirilməsi tədbirlərinə daxildir".
