Xəbər verdiyimiz kimi, bu gün Çempionlar Liqasının yarım final mərhələsi keçiriləcək. Arsenal PSJ ilə qarşılaşacaq.
Manset.az saytı oyunla bağlı bir neçə tanınmış şəxlərin proqnozlarını öyrənib. Onların bəziləri Arsenalı favorit görsə də, bəziləri oyunun heç-heçə nəticələnəcəyini bildirib.
Bununla bərabər PSJ-nin qələbəsinə inananlar da var.
Deputat Aqil Abbas: "Mən daha çox öz futbolumuzu izləməyə üstünlük verirəm. Buna baxmayaraq, Arsenalı favorit görürəm".
Azxeber.com xəbər portalının baş redaktoru Hacıbəy Heydərli: "Arsenal” - PSJ oyunu çox böyük maraqla gözlənilir. Bugünki dueldə düşünürəm ki, “Arsenal” qələbə qazanacaq. PSJ bu mərhələyə qədər iki ingilis klubu “Liverpul” və “Aston Villa”nı mübarizədən kənarlaşdırıb.
Ancaq “Arsenal” da bu il çox güclü təsir bağışlayır, londonlular 1/4 finalda “Real Madrid”i hər iki oyunda məğlub etdilər. Bu səbəbdən də “Arsenal” ilk oyunun favoritidir.
Proqnozum bundan ibarətdir ki, “Arsenal” son aylar əldə etdiyi yüksək performansı davam etdirəcək. Düşünürəm ki, hesab 2:1 “Arsenal”ın xeyrinə yekunlaşacaq. Ümumilikdə isə bu cütlüyün qalibinin PSJ olacağını düşünürəm. Parislilər ikinci oyunda 3:0 qələbə qazanacaq".
Əməkdar İncəsənət xadimi Baba Vəziroğlu: "Mən illərdir futbol izləmirəm. Hətta nifrət edirəm. O nədir? 22 kişi bir topun arxasınca qaçır".
General-mayor Novruzəli Orucov: "Əlbəttə, oyun maraqlı olacaq. Mən düşünürəm ki, Arsenal qalib olacaq. PSJ Fransanın klubudur. Fransızları favorit hesab etməkdənsə, İngilislərin futbolu daha gözəldir. Arsenalın 2:1 qalib gələcəyini düşünürəm".
Əməkdar artist Vasif Məhərrəmli: "Bu gün keçiriləcək yarım finalda Arsenaldan böyük hesablı qələbə gözləyirəm. Düzdür, mənim favorim Barselonadır. Amma Arsenaldan 4:0 hesablı qələbə gözləyirəm".
Gənclər və İdman nazirinin sabiq müavini İsmayıl İsmayılov: "Məncə güclü qalıb gələcək. Hazırda Arsenal çox güclü futbol oyunu sərgiləyir. Onun qalib gələcəyini düşünürəm".
ATV telekanalının keçmiş vitse-prezidenti Natiq İbrahimov oyunu maraqla izləyəcəyini bildirib. Hesabın isə 2:2 nəticələnəcəyini qeyd edib.
Sitat.info saytının rəhbəri Məğrur Salmanov: "Oyunu böyük həyəcanla gözləyirəm. Düşünürəm ki, Arsenal 3:1 hesabı ilə qalib gələcək".
Qol.az saytının əməkdaşı Ramiq Ağaməmmədov: "Arsenalın oyunda üstünlük qazanacağını düşünürəm. Fikrimcə, hesab təxminən 2:0 olacaq və Arsenal qələbə qazanacaq".
