"İranın bombalanması ciddi geosiyasi dəyişikliklərə səbəb olacaq" Manset.az

"İranın bombalanması ciddi geosiyasi dəyişikliklərə səbəb olacaq"

15:04 - 4 Aprel 2025

"Amerika prezidenti Donald Tramp İrana iki ay müddətində yeni şərtlərlə razılaşma imzalamaq üçün vaxt verib. Bu yeni şərtlər, əsasən, uranın saflaşdırılması prosesinə nəzarət və Beynəlxalq Atom Enerjisi Agentliyinin (IAEA) İrana geri qayıdıb, bu resurslara baxış keçirməsi ilə bağlıdır. Şübhə yoxdur ki, İran nüvə silahı əldə etməyə çox yaxındır. Hətta, bunun yalnız mülki məqsədlərlə edildiyini iddia etsə də, Amerika Birləşmiş Ştatları vurğulayır ki, əgər İran nüvə başlığı əldə edərsə, bu, təkcə bölgəyə deyil, həm də onun ən böyük müttəfiqi olan İsrailə ciddi təhlükə yaradacaq".

Bu sözləri Manset.az-a siyasi şərhçi Əziz Əliyev deyib.

O bildirib ki, İranın proksi qruplarının sıradan çıxarılması prosesi gedir:

"Məsələn, Hizbullalar və digər müttəfiqlər üzərində təsir göstərilib. Son dövrlərdə isə Husilərin bombalanması prosesini də müşahidə edirik. Yəni, İranın müttəfiqləri və resursları sıradan çıxarılır.

B-52 bombardmançı təyyarələri artıq Körfəzə göndərilib. Xaminei ilə Tramp arasında məktublaşma və yazışmalardan sonra İran tərəfi hələ də 100%-lik "yox" cavabını verməsə də, kiçik bir imkan qapısı açıb. Bu vəziyyətdə İran razılaşmasa və apardığı nüvə tədqiqatları ilə bağlı nəticələri Beynəlxalq Müşahidə Missiyasının təhlükəsizliyini təmin etməsə, daha çox sanksiya və hərbi müdaxilə gözlənilir".

Əziz Əliyev qeyd edib ki, İranın bombalanması ciddi geosiyasi dəyişikliklərə səbəb olacaq:

"İranın işğalı, qoşun yeridilməsi çox çətindir, çünki o, böyük bir ölkədir. Lakin, müttəfiqləri və İsrailin yerləşdirdiyi xüsusi silahlarla İranın nüvə proqramı hədəf alınacaq. Bu vəziyyətin qarşısında İranın adekvat cavabı İsrailə və onun müttəfiqlərinə qarşı olacaq.

Bu qarşılıqlı zərbələr, Azərbaycanın mövqeyinə də təsir edəcək. Azərbaycanın bölgədəki ciddi təsiri var. Güney Azərbaycan məsələsi üzərindən İranda parçalanma prosesi gedir. Bu, ümumilikdə İslam dünyasını da parçalaya bilər. Azərbaycana gəldikdə isə, bombalanan bir ölkənin, xüsusən ABŞ tərəfindən ciddi iqtisadi sanksiyalara məruz qalması, daxili iğtişaşlara səbəb ola bilər. Bu, İsrailin və ABŞ-nin xüsusi maraqları ilə əlaqələndirilərək, hakimiyyət dəyişikliyi və əvvəlki şah rejiminin bərpasına doğru gedə bilər. Bu proses xüsusən Güney Azərbaycanın mövqeyinə ciddi təsir göstərəcək".

Seyranə Quliyeva