Azərbaycan-Almaniya əlaqələri yeni mərhələyə qədəm qoyur Manset.az

Azərbaycan-Almaniya əlaqələri yeni mərhələyə qədəm qoyur

11:42 - 4 Aprel 2025

"Almaniya Federativ Respublikasının Prezidenti Frank-Valter Ştaynmayerin Azərbaycana ilk rəsmi səfəri konkret əməkdaşlıq istiqamətləri üzrə praktiki nəticələrə yol açacaq. Prezident İlham Əliyev və Prezident Ştaynmayer arasında keçirilən görüşlərdə müxtəlif sahələr üzrə əməkdaşlığın dərinləşdirilməsi barədə fikir mübadiləsi aparılıb. Səfər çərçivəsində həm ikitərəfli, həm də regional və qlobal xarakterli məsələlər müzakirə olunub. Bu da göstərir ki, Azərbaycan və Almaniya təkcə ikitərəfli maraqlarla kifayətlənmir, eyni zamanda beynəlxalq proseslərə dair ümumi baxışlar formalaşdırmaq niyyətindədir".

Bu sözləri Manset.az-a açıqlamasında Milli Məclisin deputatı, tarix elmləri doktoru Vasif Qafarov deyib. Onun sözlərinə görə, Azərbaycan ilə Almaniya arasında diplomatik münasibətlər 1992-ci ildə qurulub:

"Almaniya Azərbaycanın müstəqilliyini tanıyan ilk Avropa ölkələrindən biri kimi tarixə düşüb. Elə həmin il hər iki ölkənin paytaxtlarında səfirliklər fəaliyyətə başlayıb. O vaxtdan bəri Azərbaycan-Almaniya münasibətləri siyasi dialoqla yanaşı, iqtisadi, mədəni, elmi və humanitar sahələrdə də ardıcıl şəkildə inkişaf edib. 2012-ci ildə Bakıda Alman-Azərbaycan Xarici Ticarət Palatasının açılması iki ölkə arasında iqtisadi əməkdaşlığın institusional əsaslarını daha da möhkəmləndirib. Həmin vaxtdan bu günə qədər ticarət əlaqələri güclənmiş, qarşılıqlı investisiyalar, biznes forumları və texnologiya transferi kimi sahələrdə ciddi addımlar atılıb. İndiyə qədər Azərbaycan və Almaniya arasında 77 rəsmi sənəd imzalanıb ki, bu da münasibətlərin hüquqi bazasının genişliyini və sabitliyini göstərir.

Son aylar ərzində iki ölkə arasında ticarət dövriyyəsinin üç dəfə artması, xüsusilə də Azərbaycanın Almaniyaya xam neft ixracının yüksəlməsi, iqtisadi əlaqələrin keyfiyyətcə yeni mərhələyə keçdiyini göstərir. Bununla yanaşı, Azərbaycan son illər ərzində iqtisadiyyatını şaxələndirmə strategiyasına uyğun olaraq bərpaolunan enerji sahəsində ciddi layihələrə start verib. 2030-cu ilə qədər ölkənin 6 giqavat yaşıl enerji istehsalı hədəfi var. Bu məqsədlə Almaniyanın qabaqcıl texnologiyalarından və təcrübəsindən istifadə edilməsi planlaşdırılır. Artıq bəzi Alman şirkətləri Azərbaycanda külək və günəş enerjisi sahəsində pilot layihələrin icrasına maraq göstərir. Bundan əlavə, nəqliyyat və logistika sahəsində də əməkdaşlıq üçün yeni imkanlar formalaşır. Azərbaycanın coğrafi mövqeyi onu Avropa və Asiya arasında strateji körpü halına gətirir. Almaniya bu potensialdan faydalanaraq Mərkəzi Asiya və Çin bazarlarına çıxışda Azərbaycanın nəqliyyat infrastrukturuna maraq göstərir".

Vasif Qafarov onu da bildirib ki, səfər çərçivəsində diqqət mərkəzində olan mövzulardan biri də Cənubi Qafqazda sülh və sabitlik məsələsi idi:

"Prezident İlham Əliyev Ermənistanla aparılan sülh danışıqları barədə məlumat verərək, artıq 17 bənddən ibarət sülh müqaviləsinin mətni üzrə razılaşmanın əldə olunduğunu bildirdi. İndi Azərbaycanın əsas gözləntisi Ermənistanın konstitusiyasında yer alan Azərbaycana qarşı ərazi iddialarının aradan qaldırılması və ATƏT-in Minsk qrupunun ləğv edilməsidir. Bu iki şərt yerinə yetirilərsə, sülh müqaviləsinin imzalanması üçün heç bir maneə qalmayacaq. Almaniya tərəfi də bölgədə sabitliyin və dinc birgəyaşayışın təmin olunmasında maraqlı olduğunu bildirib, prosesə dəstək verməyə hazır olduğunu vurğulayıb.

Prezident Frank-Valter Ştaynmayerin Azərbaycana rəsmi səfəri iki ölkə arasında ilk belə səfər kimi tarixə düşdü. Bu faktın özü belə, əlaqələrin strateji xarakter almağa başladığını göstərir. Diplomatik və iqtisadi əsaslar üzərində qurulmuş bu tərəfdaşlıq, yaxın illərdə enerji təhlükəsizliyi, texnologiya, təhsil, iqlim dəyişikliyi ilə mübarizə və mədəniyyətlərarası dialoq kimi sahələri də əhatə edə bilər. Bu səfər, eyni zamanda, Azərbaycanın beynəlxalq siyasətdə artan rolunun və qlobal tərəfdaşlıqlara verdiyi önəmin bir nümunəsidir".